ដំណើរការត្រឹមត្រូវនៃសិទ្ធិមនុស្ស និងបរិស្ថាន (HREDD) កំពុងតែទទួលបានការយកចិត្តទុកដាក់កាន់តែខ្លាំងនៅក្នុងខ្សែច្រវាក់ផ្គត់ផ្គង់សកល និងត្រូវបានដាក់បញ្ចូលទៅក្នុងច្បាប់ផ្សេងៗនៃបណ្តាប្រទេសអ៊ឺរ៉ុបរួមទាំងច្បាប់ជាតិ និងកិច្ចព្រមព្រៀងពាណិជ្ជកម្មអន្តរជាតិនានា។
តើអ្វីទៅជាដំណើរការត្រឹមត្រូវនៃសិទ្ធិមនុស្ស និងបរិស្ថាន (HREDD) ?
យោងតាមនិយមន័យដែលមានចែងនៅក្នុងសេចក្តីណែនាំស្ដីពីការប្រព្រឹត្តិធុរកិច្ចប្រកបដោយការទទួលខុសត្រូវរបស់អង្គការ OECD, ដំណើរការត្រឹមត្រូវ គឺជា «ដំណើរការឥតឈប់ឈរដែលជួយដល់សហគ្រាសទាំងឡាយកំណត់បាននូវហានិភ័យពាក់ព័ន្ធនឹងសិទ្ធិមនុស្ស, សិទ្ធការងារ, និងបរិស្ថានក្នុងគោលបំណងបញ្ឈប់, បង្ការ, ឬកាត់បន្ថយហានិភ័យទាំងនោះ។ »
ហេតុអ្វីបានជាដំណើរការនេះមានសារៈសំខាន់?
គោលបំណងដំបូងគេបង្អស់នៃដំណើរការត្រឹមត្រូវ គឺដើម្បីបញ្ចៀសនូវការបង្ក ឬរួមចំណែកដល់ផលជះអវិជ្ជមានដល់មនុស្ស, បរិស្ថាន និងសង្គម ហើយព្យាយាមទប់ស្កាត់ផលជះអវិជ្ជមាននានាដែលពាក់ព័ន្ធផ្ទាល់នឹងប្រតិបត្តិការ, ផលិតផល ឬសេវាកម្មតាមរយៈទំនាក់ទំនងធុរកិច្ច។ ប្រសិនបើចៀសមិនផុតពីផលជះអវិជ្ជមាននោះទេ ដំណើរការត្រឹមត្រូវគួរតែអាចអនុញ្ញាតឲ្យសហគ្រាសកាត់បន្ថយ, ទប់ស្កាត់ការកើតឡើងវិញ, និងកែតម្រូវផលជះទាំងនោះ ប្រសិនបើអាច។
គោលការណ៍ណែនាំស្ដី្ដពីធុរកិច្ច និងសិទ្ធិមនុស្សរបស់អង្គការសហប្រជាជាតិ (UNGPs) បានចែងថាទាំងរដ្ឋាភិបាល ទាំងក្រុមហ៊ុនត្រូវទទួលខុសត្រូវបង្ការទប់ស្កាត់ និងដោះស្រាយផលជះអវិជ្ជមានពីសកម្មភាពធុរកិច្ចរបស់ខ្លួនលើមនុស្ស និងបរិស្ថាន។
ច្បាប់ស្ដីពីដំណើរការត្រឹមត្រូវនៃប្រទេសមួយចំនួនទូទាំងពិភពលោកកំពុងតែជុំរុញបណ្តាក្រុមហ៊ុនបញ្ជាទិញទាំងឡាយឲ្យរៀបចំការអនុវត្តធុរកិច្ចឲ្យកាន់តែមានការទទួលខុសត្រូវ និងអនុវត្តដំណើរការត្រឹមត្រូវទាំងក្នុងប្រតិបត្តិការ និងក្នុងខ្សែច្រវាក់ផ្គត់ផ្គង់របស់ខ្លួន។
